काठमाडौँ। टस हारेर सुरुवातमा खराब ब्याटिङको सामना गरेको नेपालले आइसिसी टी–२० विश्वकप क्रिकेटमा टेस्ट टोली वेस्ट इन्डिजलाई जितका लागि एक सय ३४ रनको सामान्य लक्ष्य दिएको छ ।

मुम्बईस्थित वनखेडे मैदानमा टस हारेर पहिले ब्याटिङ्सको निम्तो पाएको नेपालले निर्धारित २० ओभरमा आठ विकेटको क्षतिमा एक सय ३३ रन बनायो ।

नेपालका लागि उपकप्तान दीपेन्द्रसिंह ऐरीले अर्धशतकीय इनिङ्स खेल्नुभयो । सर्वाधिक ५८ रन बनाउनुभएका उहाँले तीन चौका र तीन छक्का हानेका छन् ।

यससँगै दीपेन्द्रसिंह टी–२० विश्वकपमा अर्धशतक प्रहार गर्ने दोस्रो नेपाली खेलाडी बने । यसअघि सन् २०१४ को विश्वकपमा सुवास खकुरेलले अर्धशतक बनाएका थिए ।

यसअघि पावर प्लेमै तीन विकेट गुमाएको नेपालका ओपनर कुशल भुर्तेल एक रनमा आउट हुनुभयो । यस्तै आशिफ शेख ११ रन जोड्दै पेभेलियन फर्किए ।

कप्तान रोहित पौडेल पाँच र आरिफ शेह दुई रन जोड्दै बाहिरिएपछि नेपालको आशा दीपेन्द्रसिंह र लोकेश बममा रहेको थियो । लोकेश १३ रनमा क्याच आउट भए।। त्यसपछि गुल्शन झा ११ रन बनाए ।

सोमपाल कामीले अविजित २६ रन बनाए । उनले १५ बलमा चार चौका हानेका थिए । सोमपाल नेपालका लागि लगातार तेस्रो विश्वकप खेल्ने एक्लो खेलाडी समेत बनेका छन् । करण केसी एक रनमा क्याच आउट भए ।

बलिङमा वेस्ट इन्डिजका जासोन अहोल्डरले चार विकेट लिए । उनले पूरा चार ओभर बलिङ गर्दैै २७ रन खर्चिए । यस्तै म्याथ्यु फर्ड, अकिल हुसेन, समर जोसेफ र रोस्टोन चेसले एक एक विकेट लिए ।