काठमाडौं । हिन्दू धर्मावलम्बीहरूको महान् पर्व महाशिवरात्रि आज देशभर श्रद्धा, भक्तिभाव र धार्मिक आस्थासहित मनाइँदै छ। हरेक वर्ष फागुन कृष्ण चतुर्दशीका दिन मनाइने यस पर्वमा भगवान् शिवको विशेष पूजा–आराधना, व्रत, ध्यान र जाग्राम बस्ने परम्परा रहेको छ।

महाशिवरात्रिलाई भगवान् शिव र माता पार्वतीको विवाह भएको दिनका रूपमा लिइन्छ। साथै, समुद्र मन्थनको क्रममा निस्किएको हलाहल विष भगवान् शिवले आफ्नो कण्ठमा धारण गरी सृष्टिको रक्षा गरेको दिनसमेत भएकाले यो पर्व त्याग, करुणा र संरक्षणको प्रतीक मानिन्छ।

आज बिहानैदेखि शिवालयहरूमा भक्तजनको भीड देखिएको छ। विशेषगरी पशुपतिनाथ मन्दिर क्षेत्रमा देश–विदेशबाट आएका साधु–सन्त, योगी तथा श्रद्धालुहरूको उल्लेख्य उपस्थिति रहेको छ। भक्तजनहरूले शिवलिङ्गमा जल, दूध, बेलपत्र अर्पण गर्दै “ॐ नमः शिवाय” मन्त्र जपिरहेका छन्।

महाशिवरात्रिको अवसरमा भक्तजनहरूले व्रत बसेर रातभर जाग्राम गर्ने, ध्यान तथा साधना गर्ने चलन छ। धार्मिक विश्वासअनुसार यस दिन श्रद्धापूर्वक पूजा–आराधना गरेमा मनोकामना पूरा हुने, पाप नाश हुने र जीवनमा सकारात्मक परिवर्तन आउने मान्यता रहेको छ।

सरकारले महाशिवरात्रिलाई राष्ट्रिय पर्वका रूपमा सार्वजनिक बिदा दिएको छ। सुरक्षा व्यवस्थालाई ध्यानमा राख्दै पशुपति क्षेत्रसहित प्रमुख शिवालयहरूमा सुरक्षाकर्मी परिचालन गरिएको छ।

महाशिवरात्रिको अवसरमा भक्तजनहरूले व्रत बसेर रातभर जाग्राम गर्ने, ध्यान तथा साधना गर्ने चलन छ। देशभरका शिवालयहरुमा दर्शनार्थीहरुको भीड-भाड देखिएको छ । काठमाडौंको पशुपतिनाथ, पूर्वको हलेसी लगायत शिवालयमा महन्त, बाबा तथा भक्त्तजनहरुको घुइंचो हुने गर्दछ।

यसैगरी महाशिवरात्रिको अवसरमा आगो बालेर ताप्ने, शिवजीको प्रसाद भन्दै गाँजा, भाङ्ग जस्ता लट्ठ पार्ने वस्तु सेवन गर्न र रातभर जाग्राम बसि भजन-कृतन गर्दै नाचगान गर्न चलन रहि आएको छ । महाशिवरात्रि धार्मिक पर्व मात्र नभई आत्मसंयम, शान्ति र सकारात्मक जीवनदृष्टिको सन्देश दिने महत्वपूर्ण अवसरका रूपमा लिइन्छ।