काठमाडौँ । नेकपा एमालेका निलम्बित सचिव टोपबहादुर रायमाझी सोमबार साँझ कारागार फर्किएका छन् । भदौ २४ गते जेनजीको आन्दोलनपछि उनी सुनधारा कारागारबाट अन्य कैदी बन्दीसँगै फरार भएका थिए ।

यसअघि सुनधारा कारागारमा रहेका रायमाझीलाई फर्किएलगत्तै कारागारसमेत सरुवा गरिएको छ। उनलाई डिल्ली बजार कारागार पठाइएको छ । रायमाझी नक्कली भुटानी शरणार्थी प्रकरणमा पुर्पक्षका लागि थुनामा छन्।

जेलबाट बाहिर निस्किएपछि रायमाझीले अवस्था सामान्य भएपछि आफैँ उपस्थित हुने भन्दै फोन गरेका थिए। अन्य कैदी बन्दी पनि कोही आफैँ र कसैलाई पक्राउ गर्दै फर्काउने काम भइरहेको छ।

जेनजी आन्दोलनको क्रममा देशभरका २७ वटा कारागारमा १४ हजार ५५५ जना कैदी बन्दी फरार भएका थिए । तीमध्ये ६ हजार ९८४ जना फिर्ता भइसकेका छन् भने अझै ७ हजार ५७१ जना फरार छन् । केन्द्रीय कारागार सुनधाराबाट मात्रै ३ हजार ५२३ जना कैदी बन्दी फरार भएका थिए।

सरकार र कारागार प्रशासनले फरार भएका कैदी बन्दीलाई फिर्ता ल्याउने प्रयासलाई तीव्रता दिएका छन्।