काठमाडौँ । आगामी निर्वाचनलाई निर्णायक मोडमा पुर्‍याउने संकेत दिँदै नेपाली कांग्रेसका सभापति गगनकुमार थापा ले पोखराबाट चुनावी अभियानको शक्तिशाली उद्घोष गरेका छन्। ‘अबकी बार सरकार’ भन्ने पुरानो र अस्पष्ट नारालाई त्यागेर ‘अबकी बार सय पार’ भन्ने स्पष्ट, आक्रामक र लक्ष्यकेन्द्रित नारासहित चुनावी मैदानमा उत्रिन उनले कार्यकर्तालाई निर्देशन दिएका छन्।

शुक्रबार पोखरामा आयोजित विशाल कार्यकर्ता भेलालाई सम्बोधन गर्दै सभापति थापाले कांग्रेसलाई केवल सरकारमा पुग्ने पार्टी होइन, एकल बहुमतसहित निर्णायक शक्ति बन्ने पार्टी को रूपमा अघि बढाउने उद्घोष गरे। उनको भाषणले पोखराको राजनीतिक वातावरण मात्रै होइन, देशव्यापी चुनावी बहसलाई नै नयाँ दिशातर्फ मोडिदिएको छ।

सभापति थापाले स्पष्ट शब्दमा भने,“अब की बार सरकार भन्ने नारा लगाउन छोडिदिनुस्। अब की बार सय पार भन्ने नारा लगाउनुस्। मज्जाले बहुमतसम्म पुग्न सकिन्छ।”उनका अनुसार ‘अब की बार सरकार’ भन्ने नारा अस्पष्ट, आत्मसन्तुष्ट र गठबन्धनमुखी सोचको उपज हो। जबकि ‘अबकी बार सय पार’ भन्ने नारा आत्मविश्वास, संगठन र जनआधारमा आधारित छ।थापाले कांग्रेस कार्यकर्तालाई लक्ष्यविहीन उत्साह होइन, नतिजामुखी अभियान चलाउन आग्रह गरे। “चुनाव जित्न भावना मात्रै पर्याप्त हुँदैन, योजना, संगठन र निरन्तर जनसम्पर्क चाहिन्छ,” उनले भने।

सभापति थापाले नेपाली कांग्रेसको सबैभन्दा ठूलो शक्ति नै १६५ वटै निर्वाचन क्षेत्रमा उम्मेदवारी दिने क्षमता भएको बताए।“१६५ वटै निर्वाचन क्षेत्रमा चुनाव लड्ने कांग्रेस मात्रै एउटा पार्टी हो। यही हाम्रो शक्ति हो, यही हाम्रो पहिचान हो।”उनले कांग्रेसलाई ‘क्याडर पार्टी’ मात्र नभई घरघर र गाउँगाउँसम्म जरा गाडेको जनआधारित पार्टी का रूपमा चित्रण गरे। कांग्रेससँग संगठन मात्रै होइन, इतिहास, त्याग र संघर्षको पूँजी पनि रहेको उनको भनाइ थियो।

थापाले विगतका चुनावी शैलीप्रति आत्मालोचना गर्दै अब पुरानो ढर्राको प्रचार प्रसारले चुनाव नजितिने स्पष्ट पारे।“हिजोको जस्तो चुनावी प्रचारले हुँदैन। उमेदवारसँगै घरदैलो भनेर हिँडेर मात्र पनि पुग्दैन।”उनका अनुसार कार्यकर्ताले जनताको दैनिक जीवन, समस्या र आशासँग प्रत्यक्ष जोडिनुपर्छ। टोलटोलमा पुगेर भाषण गर्ने होइन, सुन्ने, बुझ्ने र समाधानको भरोसा दिलाउने राजनीति गर्नुपर्ने समय आएको छ।

सभापति थापाले सामाजिक सञ्जाललाई उपयोगी माध्यम मान्दै त्यसमा मात्र सीमित नहुन कडा चेतावनी दिए।“सामाजिक सञ्जालमा अड्किनु हुँदैन। हल्लाबाट डराउनु हुँदैन।”उनले भर्चुअल संसारको भ्रममा परेर वास्तविक जनमतको आँकलन नगर्ने गल्ती नगर्न कार्यकर्तालाई आग्रह गरे। फेसबुक, टिकटक र ट्विटरमा देखिने समर्थन मात्रै चुनाव जित्ने आधार नहुने उनको स्पष्ट सन्देश थियो।

चुनावी मौसमसँगै फैलिने अफवाह, दुष्प्रचार र योजनाबद्ध आक्रमणप्रति सचेत रहन उनले कार्यकर्तालाई निर्देशन दिए।“हल्लाबाट नडराउनुहोस्। डराउनेले राजनीति गर्न सक्दैन।”थापाका अनुसार कांग्रेसलाई कमजोर देखाउने प्रयासहरू स्वाभाविक हुन्, तर त्यसको उत्तर संयम, तथ्य र जनसेवामार्फत दिनुपर्ने बताए।

उनले अतीतका असहमति र टुटफुटलाई बिर्सेर पार्टी छाडेर गएकाहरूलाई हृदय खुला राखेर स्वागत गर्नुपर्ने बताए।“हाम्रो लक्ष्य ठूलो छ। त्यसका लागि मन ठूलो बनाउनुपर्छ।”उनका अनुसार कांग्रेसलाई बलियो बनाउन गएकोलाई फर्काउने, रिसाएकोलाई मनाउने र छुटेकालाई जोड्ने नीति अपरिहार्य छ।

थापाले ‘अबकी बार सय पार’ नारा केवल उत्साहजनक वाक्य होइन, व्यावहारिक रणनीतिमा आधारित लक्ष्य भएको दाबी गरे।उनका अनुसार , संगठन सुदृढ छ , जनआधार देशव्यापी छ , विकल्प खोजिरहेका मतदाताको संख्या बढ्दो छ , कांग्रेसमाथि भरोसा फर्किँदै छ ,यी सबै कारणले कांग्रेसले एकल बहुमत नजिक पुग्न सक्ने उनको दाबी छ।

पोखराको यो कार्यक्रमले एउटा स्पष्ट सन्देश दिएको छ , नेपाली कांग्रेस अब रक्षात्मक होइन, आक्रामक र लक्ष्यकेन्द्रित राजनीतितर्फ अघि बढ्दैछ।गगन थापाको भाषणले कांग्रेसभित्र मात्र होइन, प्रतिपक्षी दलहरूमा समेत राजनीतिक तरंग पैदा गरेको छ। ‘अबकी बार सय पार’ नारा अब पोखरामा सीमित रहेन, देशव्यापी बहसको केन्द्र बनेको छ।

पोखराबाट गगन थापाले फुकेका यी शब्दहरू केवल भाषणका वाक्य होइनन्, कांग्रेसको आगामी चुनावी रणनीतिको घोषणापत्र जस्तै देखिएका छन्।अब प्रश्न उठेको छ , के कांग्रेस साँच्चै ‘सय पार’ नजिक पुग्ला?के कार्यकर्ताले यो निर्देशनलाई व्यवहारमा उतार्लान्?के गगन थापाको आक्रामक नेतृत्वले चुनावी समीकरण उल्ट्याउला?उत्तर आउनेछ चुनावी नतिजासँगै। तर यति भने स्पष्ट छ , पोखराबाट कांग्रेसको चुनावी घण्टी बजिसकेको छ।