काठमाडाैं । वाशिंगटन डि सीस्थित व्हाइट हाउसका पत्रकारहरूसँग अमेरिकी राष्ट्रपति डोनाल्ड ट्रम्पको डिनर कार्यक्रममा गोली चलेपछि एक संदिग्ध व्यक्तिलाई हिरासतमा लिइएको छ। गोली चलेको आवाज आएपछि राष्ट्रपति ट्रम्पलाई विशेष सुरक्षाकर्मीहरूले घेराबन्दी गर्दै सुरक्षित रूपमा कार्यक्रम स्थलबाट बाहिर लगिएका थिए।

त्यसपछि ट्रम्पले ट्रुथ सोसलमा दुई तस्बिर साझा गरे, जसमा एक जना शर्ट बिना व्यक्ति भुइँमा हात पछाडि राखेर देखिएको छ। उक्त व्यक्तिलाई ‘संदिग्ध आक्रमणकारी’ मानिएको छ। यस व्यक्तिबारे केही जानकारी राष्ट्रपति डोनाल्ड ट्रम्पले दिएका छन् भने केही विवरण प्रहरीले सार्वजनिक गरेको छ।

अमेरिकी मिडिया रिपोर्टका अनुसार, संदिग्ध आक्रमणकारीको पहिचान ३१ वर्षीय कोल टोमस एलनका रूपमा भएको छ, जो क्यालिफोर्नियाको टोरेन्सका बासिन्दा हुन्।

मेट्रोपोलिटन पुलिस विभागका अन्तरिम प्रमुख जेफ्री क्यारोलले बताए कि उक्त संदिग्ध त्यही होटलको पाहुना थियो जहाँ कार्यक्रम भइरहेको थियो। उनी बसेको कोठाको पनि जाँच भइरहेको छ।

जेफ्री क्यारोललाई “संदिग्धको उद्देश्य के थियो ?” भनेर सोधिएकोमा उनले हालसम्म स्पष्ट नभएको बताए।

उनले भने, “गोली चलेको भन्दैमा सुरक्षामा कमजोरी थियो भन्ने होइन। जस स्थानमा संदिग्धलाई पक्राउ गरियो, त्यो चेकपोइन्ट विशेष कारणले राखिएको थियो र त्यसले आफ्नो काम गर्‍यो।”

क्यारोलका अनुसार संदिग्धसँग धेरै हतियारहरू थिए।

उनले भने, “उससँग एउटा शटगन, एउटा ह्यान्डगन र धेरै चक्कुहरू थिए। संदिग्धलाई गोली लागेको छैन र प्रारम्भिक जाँच अनुसार ऊ एक्लै आक्रमणकारी जस्तो देखिन्छ। अहिले सर्वसाधारणका लागि कुनै खतरा छैन।”

वाशिङ्टन डीसीकी मेयरका अनुसार संदिग्ध नजिकैको अस्पतालमा उपचाररत छ र प्रहरीको हिरासतमा छ। अमेरिकी अटर्नी जीनिन पिरोका अनुसार संदिग्धमाथि दुई आरोप लगाइएको छ—हिंसात्मक अपराधका क्रममा हतियार प्रयोग गरेको र खतरनाक हतियार प्रयोग गरी संघीय अधिकारीमाथि आक्रमण गरेको।

उनले बताए अनुसार संदिग्धलाई सोमबार संघीय अदालतमा पेश गरिनेछ।

व्हाइट हाउसका पत्रकारहरूसँग आयोजित डिनर कार्यक्रममा भएको घटनाबारे राष्ट्रपति डोनाल्ड ट्रम्पले सुरक्षा व्यवस्थाबारे प्रतिक्रिया दिएका छन्। पत्रकारहरूले “पहिले कुनै संकेत थियो ?” भनेर सोध्दा उनले “कुनै सूचना थिएन” भने।

उनले आक्रमणको उद्देश्य थाहा नभएको बताए र संदिग्धलाई “धेरै खतरनाक देखिने व्यक्ति” भने। ट्रम्पका अनुसार संदिग्ध करिब ५० गज टाढाबाट दौडिँदै आएको थियो, त्यसपछि सुरक्षाकर्मीहरूले तुरुन्तै आफ्नो हतियार निकाले।

उनले उक्त व्यक्तिलाई “धेरै बिरामी मानसिक अवस्थाको मान्छे” पनि भने।

अधिकारिहरूले क्यालिफोर्नियामा रहेको संदिग्धको अपार्टमेन्टमा पनि अनुसन्धान सुरु गरेका छन्। ट्रम्पले मिडियासँग कुरा गर्नुअघि सीसीटीभी फुटेज पनि साझा गरेका थिए, जसमा होटलको बलरूमतर्फ संदिग्ध दौडिँदै गएको देखिन्छ।

उक्त व्यक्ति सुरक्षाको चेक गर्ने मेसिन पार गर्ने प्रयास गरिरहेको देखिन्छ र त्यही समयमा सुरक्षाकर्मीहरूले हतियार निकालेका थिए।

ट्रम्पले भने, “आज रात आक्रमणकारी बलरूम नजिक पुग्न सकेन, किनभने त्यो पूर्ण रूपमा सुरक्षित गरिएको थियो।”

हालका वर्षहरूमा ट्रम्पमाथि दुई पटक ज्यान मार्ने प्रयास भइसकेको छ। प्रहरीले हालसम्म शनिबारको घटनाको उद्देश्य खुलाएको छैन।

बीबीसीका उत्तर अमेरिका संवाददाता ग्यारी ओ’डोनह्यू पनि उक्त डिनर कार्यक्रममा उपस्थित थिए।

उनका अनुसार यो घटना अमेरिकी समय अनुसार राति करिब ८:३५ बजे भएको हो। ‘हामी स्टेजबाट करिब ४० फिट टाढा बसेका थियौं र मुख्य ढोका करिब १०० फिट टाढा थियो’, घटनाबारे उनले भनेका छन्, ‘मुख्य ढोकातर्फबाट केही आवाजहरू आयो। त्यो के थियो भन्ने स्पष्ट थिएन, तर ती आवाजहरू हल्का विस्फोट जस्ता थिए, जुन प्रायः अटोमेटिक फायरजस्तै सुनिन्छ।’

उनका अनुसार, एक हतियारधारी व्यक्ति प्रवेशद्वारमा रहेको म्याग्नेटोमिटर पार गर्ने प्रयास गर्दा सीक्रेट सर्भिस र सुरक्षा टोलीले उसलाई पक्राउ गरेका थिए। एजेन्सी