काठमाडौ। अमेरिका र इरानबीच युद्धविरामका लागि मुख्य मध्यस्थकर्ताको भूमिका खेलेको पाकिस्तानले दीर्घकालीन शान्तिका लागि थप छलफल गर्न शुक्रबार इस्लामावादमा निम्तो दिएको छ। यद्यपि पछिल्लो घटनाक्रमहरूले संवाद अघि बढ्नेमा शंका उत्पन्न भएको छ।

हालै घोषणा गरिएको दुई हप्ताको युद्धविरामपछि मध्यपूर्वमा तनाव कम गर्ने उद्देश्यले उच्चस्तरीय शान्ति वार्ताका लागि अमेरिका र इरानका प्रतिनिधिमण्डलहरू पाकिस्तानको इस्लामाबाद पुग्ने भएका छन् ।

पाकिस्तानले सुरक्षा र बन्दोबस्तीको तयारीलाई तीव्र पारिएको छ भने रंगरोकन सुरु भएको छ । पाकिस्तानी गृहमन्त्री मोहसिन नक्वीले भ्रमणमा आउने सबै विदेशी प्रतिनिधिहरूको लागि पूर्ण सुरक्षा सुनिश्चित गर्न एक व्यापक योजना तयार गरिएको छ।

राजधानी इस्लामाबादका अधिकारीहरूले वार्ता अघि व्यापक सुरक्षा उपायहरू लागू गरेका छन्, व्यवस्थालाई सहज बनाउन इस्लामाबाद र पाकिस्तानी प्रान्त पञ्जाबको तेस्रो ठूलो शहर रावलपिंडीमा स्थानीय बिदा घोषणा गरिएको छ।

विदेशी प्रतिनिधिमण्डलहरूको आवागमनका लागि छुट्टाछुट्टै मार्गहरू तोकिएका छन् र ब्लू बुक प्रोटोकल अन्तर्गत प्रहरी, अर्धसैनिक बल र अन्य सुरक्षा एजेन्सीहरू तैनाथ गरिएको छ।

प्रहरीले एक्सप्रेस हाइवेमा यात्रुहरूलाई डाइभर्सनको बारेमा जानकारी दिएको छ । उद्धार सेवाहरू र अस्पतालहरूलाई उच्च सतर्कतामा राखिएको छ। रेड जोनमा रहेको पाँचतारे सम्पत्ति सेरेना होटललाई प्रतिनिधिमण्डलहरूको लागि मात्र आरक्षित गरिएको छ ।

अमेरिका र इजरायलले इरानमा गरेको समन्वयात्मक आक्रमणमा सर्वोच्च नेता आयातोल्लाह अली खामेनीको मृत्यु भएको ठिक ६ हप्तापछि वार्ता हुन लागेको हो। जारी द्वन्द्वले हजारौँ मानिस मारिएका छन्, विश्वको सबैभन्दा महत्त्वपूर्ण तेल मार्ग बन्द भएको छ र ऊर्जाको मूल्य अकासिएको छ।

यही बिच शनिबार इस्लामाबादमा शीर्ष अमेरिकी र इरानी अधिकारीहरूबिच वार्ता हुन लागेको हो । इरानको स्टुडेन्ट्स न्यूज एजेन्सीका अनुसार, इरानको संसदका सभामुख मोहम्मद बाकर कालिबाफले अमेरिकी उपराष्ट्रपति जेडी भान्सको नेतृत्वमा रहेको अमेरिकी प्रतिनिधिमण्डलसँग वार्ताका लागि तेहरान प्रतिनिधिमण्डलको नेतृत्व गर्नेछन्।

ह्वाइट हाउसका अनुसार अमेरिकी टोलीमा वरिष्ठ राजदूत स्टिभ विटकफ र जारेड कुशनर समावेश हुनेछन्, जसको पहिलो चरणको वार्ता शनिबार हुनेछ । वासिङ्टन र तेहरान पाकिस्तानको मध्यस्थतामा दुई हप्ते युद्धविराममा सहमत भएको केही दिनपछि यो बैठक बस्न लागेको हो।

यसैगरी, पाकिस्तानी प्रधानमन्त्री शहबाज शरीफले आफ्ना लेबनानी समकक्षी नवाफ सलाम सँग टेलिफोन वार्ता गरेका छन्।

वार्तापछि जारी गरिएको विज्ञप्तिमा पाकिस्तानी प्रधानमन्त्रीको कार्यालयले इजरायलले गरिरहेको निरन्तर आक्रमणको इस्लामावादले ‘कडा निन्दा’ गरेको उल्लेख गरेको छ। विज्ञप्तिमा थपिएको छ कि, लेबनानी प्रधानमन्त्रीले ‘लेबनान’ र त्यहाँका जनतालाई लक्षित गरी भइरहेका आक्रमणहरू तत्काल रोक्नका लागि पाकिस्तानको सहयोग मागेका छन् ।

अमेरिका र इरानबीच भर्खरै भएको युद्धविराममा लेबनान समावेश छ कि छैन भन्ने विषयमा अन्योल सिर्जना भएको छ। वासिङ्टनले लेबनान समावेश नभएको बताएको छ भने वार्ताको मध्यस्थता गरिरहेको पाकिस्तानले भने लेबनान पनि यसैमा समेटिएको दाबी गर्दै आएको छ। इरानले पनि लेबनान सम्झौताभित्रै अनिवार्य रुपमा पर्नुपर्ने माग गर्दे आएको छ । एजेन्सी